Испаниялик радио ва телевидение бошловчиси Мануэль Бартоломе Карреньо Молина Криштиану Роналду билан боғлиқ вазиятга муносабат билдирди.

Эслатиб ўтамиз, Данияга қарши Копенгагенда ўтган Миллатлар лигаси учрашуви арафасида Роналду мураббий Жорже Жезуш билан келишмовчилик сабаб Португалия терма жамоаси қароргоҳини тарк этган эди. Кейинроқ Криштиану миллий жамоадаги фаолиятини якунлагани ҳақида хабарлар тарқалди.

«Бугун Португалия Криштиану Роналдусиз ўйнаяпти. Қандай спортчи! Қандай футболчи! Шунча йил давомида ҳамма нарсани ютиб келган, унинг даражасидаги футболчини яна қачон кўрамиз?

Унинг ҳисобида бешта «Олтин тўп», шунингдек, бир нечта «Олтин бутса» ва чемпионатнинг энг яхши тўпурари совринлари бор. Миллий терма жамоа билан Европа чемпионатини ютди, клуб футболида эса, айниқса, Мадриднинг «Реал» клубида деярли барча совринларни қўлга киритди.

Аммо у енга олмаган фақат икки рақиб бор эди. Биринчиси — жаҳон футболи тахти учун йиллар давомида курашган Лео Месси. У Мессини енга олмади, аммо узоқ йиллар унга қарши курашди. Иккинчиси эса бошқа ҳеч ким эмас, унинг ўз эгоси эди. Ва, афтидан, Роналду айнан унга ютқазди», — деди Карреньо.