Рубен Лофтус-Чикнинг "Милан"даги келажаги ҳали ҳам ноаниқлигича қолмоқда. Англиялик ярим ҳимоячи қишки трансферлар ойнасидаёқ "россонери" сафини тарк этиши мумкин. Унинг кейинги манзили сифатида Премьер-лига кўрилмоқда.

TEAMtalk маълумотига кўра, "Милан" январда эҳтимолий трансферни амалга ошириш имкониятини ўрганиш учун Англиянинг бир нечта клуби билан алоқа ўрнатишни бошлаган.

Футболчининг вазиятига асосан икки омил таъсир қилмоқда: у "Милан" таркибида етарлича ўйин амалиётига эга эмас ва шартномаси мавсум якунида тугайди. Ҳозирча янги келишув бўйича музокаралар ҳам бошланмаган.

TEAMtalk хабар беришича, воситачилар Премьер-лиганинг еттита клуби — "Тоттенхэм", "Ньюкасл", "Эвертон", "Кристал Пэлас", "Ноттингем Форест", "Сандерленд" ва "Фулхэм" билан боғланган.

Шу тариқа, Лофтус-Чик Италиядаги фаолиятидан сўнг яна Англияга қайтиши мумкин. Унинг шартномаси тугашига атиги олти ой қолгани боис, "Милан" футболчини 5 миллион евродан ошмайдиган маблағ эвазига қўйиб юборишга тайёр.