Сўнгги кунларда «Манчестер Сити» атрофида юзага келган можаролар бутун Буюк Британияни клубга нисбатан қандай якуний санкциялар қўлланишини кутишга мажбур қилмоқда.
Бироқ бу вазиятнинг оқибатлари фақат клубнинг ўзи билан чекланиб қолмаслиги мумкин. Можаро Манчестер шаҳрининг 2040 йилги Олимпия ва Паралимпия ўйинларини ўтказиш учун ариза бериш режаларига ҳам таъсир қилиши эҳтимолдан холи эмас.
Агар Манчестер номзодлик имкониятидан маҳрум бўлса, Олимпиадага мезбонлик қилиш учун Британиядан Ливерпуль номзоди илгари сурилиши мумкин. Бу ҳолда Ливерпуль Лондондон кейин Олимпия ўйинларини қабул қилиш имкониятига эга бўлган иккинчи Британия шаҳрига айланиши мумкин. Лондон эса Олимпиадага уч марта мезбонлик қилган.
Манбага кўра, Буюк Британия ҳукумати шу пайтгача мамлакат шимолидаги ушбу икки йирик шаҳардан қайси бирига Олимпиада мезбонлиги учун ўз номзодини илгари суриш ҳуқуқини бериш масаласини кўриб чиқаётган эди.
