«Ливерпуль»нинг собиқ сардори Стивен Жеррард агар жамоани Юрген Клопп бошқаришини олдиндан билганида, клубда яна бир йил қолишга тайёр бўлганини тан олди.
Афсонавий ярим ҳимоячи 2015 йил ёзида «қизиллар» сафини тарк этиб, «Лос-Анжелес Гэлакси»га ўтган эди. Ўша йилнинг кузида Брендан Рожерс истеъфога чиқарилди ва унинг ўрнига кейинчалик клуб билан улкан муваффақиятларга эришган Юрген Клопп тайинланди.
«Клопп қўл остида ўйнаш учун кўп нарсадан воз кечган бўлардим. Менга яна бир йил қолиш таклиф қилинганди, аммо мураббийлар штаби билан суҳбатда анча кам ўйнашим ва асосан захирада қолишимни эшитдим.
Агар Юрген жамоага келишини билганимда, таваккал қилиб қолардим. Уни ҳайратда қолдириш ва асосий таркибдан жой олиш учун курашиб кўрган бўлардим», — деди 46 ёшли Жеррард TNT Sports билан суҳбатда.
Орадан бир ярим йил ўтиб, Стивен Жеррард футболчилик фаолиятини якунлади ва мураббийлик соҳасига қадам қўйди.
