«Милан»нинг бельгиялик ярим ҳимоячиси Алексис Салемакерс жароҳат олган ва жарроҳлик амалиётини бошдан кечириши керак. Футболчи ушбу хабардан ранжиган мухлисларга мурожаат қилди.
«Бундай лаҳзаларни бошдан кечириш осон эмас. Футболни севсангиз, майдондан, жамоадошларингиздан ва энг яхши кўрган машғулотингиздан узоқда қолиш жуда оғир бўлади.
Бу қийин давр, аммо мен уни сабр ва қатъият билан енгиб ўтаман. Севимли ишимга қайтиш истагим эса янада кучаяди.
Сўнгги кунларда менга ёзган ва қўллаб-қувватлаган барча мухлисларга, жамоадошларимга, клуб ходимларига, дўстларимга ва ҳар бир инсонга чин дилдан миннатдорлик билдирмоқчиман», — дея Салемакерснинг сўзларини pianetamilan.it келтирди.
Эслатиб ўтамиз, бельгиялик футболчи 2020 йилдан буён «Милан»га тегишли бўлиб, бир неча мавсумни ижара асосида бошқа клубларда ўтказган.
