Леверкузеннинг «Байер» клуби ва Камерун миллий терма жамоаси ҳужумчиси Кристиан Кофане жамоаси билан шартномани узайтириш бўйича музокараларни тўхтатишга қарор қилди.

Bild нашрининг хабар беришича, 20 ёшли футболчининг бундай қарор қабул қилишига Англиянинг «Манчестер Юнайтед» ва «Арсенал» клублари томонидан билдирилаётган қизиқиш сабаб бўлган.

Кофаненинг «Байер» билан амалдаги шартномаси 2029 йилнинг ёзига қадар мўлжалланган. Бироқ Германия клуби иқтидорли ҳужумчини янада узоқ муддатга жамоада сақлаб қолишни режалаштирган эди.

Манба маълумотига кўра, камерунлик футболчи сентябрь ойида 2031 йилгача амал қиладиган янги шартномани имзолаши керак эди.

Янги келишувга мувофиқ, Кофаненинг йиллик маоши 1 миллион евродан 4 миллион еврогача оширилиши кўзда тутилган. Шундай қилиб, футболчининг даромади тўрт баробарга кўпайиши мумкин эди.

Бироқ «Манчестер Юнайтед» ва «Арсенал»нинг қизиқиши музокаралар жараёнини мураккаблаштирган.

Айниқса, Лондон клуби камерунлик ҳужумчини ўз сафига қўшиб олишга жиддий қизиқиш билдирмоқда. Маълум қилинишича, «Арсенал» вакиллари жорий йилнинг баҳоридан буён Кофане билан алоқада бўлиб келмоқда.

Шу сабабли 20 ёшли футболчи ҳозирча «Байер» билан янги шартнома имзолашга шошилмаяпти.

Маълумот учун, Кристиан Кофане ўтган мавсумда барча мусобақалар доирасида 44 та учрашувда иштирок этиб, еттита гол урди ва тўққизта голли узатмани амалга оширди.