Ўзбекистонлик таниқли шахматчи, Олимпиада чемпиони Нодирбек Абдусатторов юқори даражадаги шахматда психологик барқарорлик ва ҳиссиётларни назорат қилиш катта аҳамиятга эга эканини таъкидлади.

Унинг фикрича, шахматчи партия давомида аввалги хатолар ёки салбий ўйларга берилиб кетмасдан, бутун эътиборини доскадаги вазиятга қаратиши зарур.

«Партиядан кейинги салбий фикрларни ортда қолдириш керак. Ўйин пайтида эса бутун диққат доска ва позицияда бўлиши лозим. Бундай ўйлар нафақат чалғитади, балки куч ва энергияни ҳам олиб қўяди», — деди Абдусатторов.

Гроссмейстернинг таъкидлашича, кўп ҳолларда шахматчилар техник эмас, балки психологик омиллар сабаб очко йўқотади.

«Мен шуни тушундимки, кўп очколар айнан шундай вазиятларда бой берилади. Вақт ўтиши билан юқори босимли ҳолатларда ўзимни яхшироқ назорат қилишни ўргандим», — деди у.

Абдусатторов элита даражасидаги шахматда катта фарқни кўпинча жуда кичик жиҳатлар юзага келтиришини ҳам қайд этди.

«Энг юқори даражада ҳатто майда деталлар ҳам партия тақдирини ҳал қилиши мумкин. Агар шу жиҳатларни такомиллаштириб борсангиз, умумий ўйинингиз ҳам сезиларли даражада кучаяди», — деди шахматчи.