"Манчестер Юнайтед" айни пайтда Туркиянинг "Трабзонспор" клубида ижара асосида тўп сураётган камерунлик дарвозабон Андре Онана билан хайрлашишга қарор қилди.
Бу ҳақда The Touchline аккаунти хабар бермоқда.
Манкунианликлар 30 ёшли африкалик футболчининг тўлиқ трансфери юзасидан Туркия клуби билан музокаралар ўтказмоқчи.
Ўз навбатида, "Трабзонспор" Онананинг ўйинларидан мамнун ва у билан узоқ муддатли шартнома имзолашга тайёр.
Дарвозабоннинг ижара келишуви келаси йилнинг июнь ойи охиригача амал қилади.
Футболчининг трансфер қиймати 8 миллион еврога баҳоланмоқда.
Андре Онана жорий мавсум Туркия чемпионатида олтита учрашувда майдонга тушиб, ўз дарвозасидан бешта гол ўтказиб юборди.
