«Рома» ҳужумчиси Дониэлл Мален «Астон Вилла»ни тарк этиш сабаблари ҳамда Рим клуби бош мураббийи Жан Пьеро Гасперини билан ишлаш жараёни ҳақида гапирди.

Футболчи Corriere dello Sport нашрига берган интервьюсида Англия клубидан кетиш қарорини шахсан ўзи қабул қилганини таъкидлади.

Мален 2026 йил январь ойида ижара асосида «Рома»га ўтган, мавсум якунланганидан сўнг эса римликлар унинг трансфер ҳуқуқини 25 миллион еврога сотиб олган эди.

«Мен ўйнашни, ҳар ҳафта майдонга тушишим ва муҳим роль ўйнашим мумкин бўлган жамоанинг бир қисми бўлишни истардим.

Ўша пайтда ўзимни муҳим футболчи сифатида ҳис қилмаганман. Шунинг учун тўғри қарор қабул қилганман, деб ҳисоблайман.

Ҳозир эса ўзимни керакли жойда эканимни ва атрофимда тўғри инсонлар борлигини ҳис қиляпман», — деди Мален.

Нидерландиялик ҳужумчи Гасперинининг футболчилар билан ишлаш услубини ҳам юқори баҳолади.

«У сизга ҳеч қачон ёлғон гапирмаслигини биласиз. Баъзан унинг машғулотлари ҳақиқатан ҳам жуда оғир кечади», — дея таъкидлади футболчи.

Мален жорий мавсум Италия А Сериясида бешта учрашувда майдонга тушиб, олтита гол урди.

Умумий ҳисобда эса нидерландиялик ҳужумчи «Рома» сафида 26 та ўйинда 21 марта рақиблар дарвозасини ишғол қилган.