"Тоттенхэм"нинг собиқ футболчиси Крис Уоддл Лондон клуби ҳамда "Манчестер Юнайтед"нинг Англия Премьер-лигасидаги муваффақиятсиз старти ҳақида фикр билдирди.
Унинг таъкидлашича, ҳар икки жамоа ҳам қийин даврни ортда қолдириб, мавсум давомида ўз ўйинини яхшилашга қодир.
"Менимча, "Тоттенхэм"нинг ўйини умидбахш кўринди. Жамоа биринчи бўлимда жуда яхши ҳаракат қилди.
Иккинчи бўлимда эса "Манчестер Юнайтед" ўйин суръатини оширди. Умуман олганда, "Тоттенхэм" ажойиб ўйин намойиш этди.
"Манчестер Юнайтед"ни эса ҳали жуда кўп иш кутмоқда. Жамоа ўз кучига бўлган ишончни йўқотган ва уни қайта тиклаши керак.
Шунга қарамай, менимча, жорий мавсумда ҳар икки жамоанинг ҳам ишлари яхши бўлади. Уларга шунчаки ўз кучига бўлган ишонч етишмаяпти", — дея Уоддлнинг сўзларини келтиради BBC Sport.
Эслатиб ўтамиз, "Манчестер Юнайтед" ва "Тоттенхэм" Англия Премьер-лигасининг 6-турида ўзаро тўқнаш келди. Мазкур учрашув 1:1 ҳисобидаги дуранг билан якунланди.
