Лондоннинг «Тоттенхэм» клуби ҳужумчиси Доминик Соланке жамоа раҳбарияти таркибни кучайтиришни режалаштираётганига қарамай, клубни тарк этиш ниятида эмас. Бу ҳақда Football Insider нашри хабар бермоқда.

Манба маълумотига кўра, 29 ёшли англиялик футболчи «Тоттенхэм»да қолиш ва асосий таркибдан жой олиш учун курашишга қатъий қарор қилган.

Лондон клуби январь ойида янги ҳужумчи сотиб олишни режалаштирмоқда. Бироқ бу қарор Соланкенинг ўрнига бошқа футболчи олиб келишни эмас, балки ҳужум чизиғида рақобатни кучайтиришни назарда тутади.

Эслатиб ўтамиз, «Тоттенхэм» 2024 йилда Доминик Соланкенинг трансфери учун «Борнмут»га 65 миллион евро тўлаган эди.

Англиялик ҳужумчи жорий мавсумда барча мусобақалар доирасида 8 та учрашувда майдонга тушиб, 2 та гол урди.

Соланкенинг «Тоттенхэм» билан амалдаги шартномаси 2030 йилга қадар мўлжалланган.