Бугун, 12 октябрь куни Осиё Чемпионлар лигаси Элит турнирининг Ғарб минтақасида 2-тур учрашувлари бўлиб ўтади. Фарғонанинг "Нефтчи" клуби Саудия Арабистони пойтахти Ар-Риёдда Криштиану Роналду тўп сураётган "Ан-Наср" жамоаси меҳмони бўлади.
Мусобақани ғалаба билан бошлаган Ўзбекистон чемпионини бу сафар қитъанинг энг кучли таркибларидан бирига эга клубга қарши мураккаб баҳс кутмоқда. "Ан-Наср" эса биринчи турдаги йирик мағлубиятдан кейин ўз майдонида вазиятни ўнглашга интилади.
Жамоалар Элит ОЧЛни қандай бошлади?
Исломбек Исмоилов бошчилигидаги "Нефтчи" мусобақанинг дастлабки турида Ироқнинг "Ал-Қува Ал-Жавия" клубини 1:0 ҳисобида мағлуб этди. Фарғоналикларга уч очко келтирган ягона голни учрашувнинг 83-дақиқасида Зоран Марушич киритди.
Шу тариқа, "Нефтчи" қитъа мусобақасидаги иштирокини муваффақиятли бошлаб, Ғарб минтақасидаги турнир жадвалида дастлабки уч очкосини қўлга киритди.
"Ан-Наср" эса биринчи турда БААнинг "Ал-Айн" жамоасига сафарда 0:4 ҳисобида мағлуб бўлди. Мазкур натижа Саудия Арабистони клуби учун кутилмаган зарба бўлди.
Энди Ар-Риёд жамоаси ўз мухлислари қаршисида мусобақадаги дастлабки очколарини қўлга киритишга ҳаракат қилади. Бу эса мезбонларнинг ҳужумкор ўйин намойиш этиш эҳтимолини оширади.
"Нефтчи"нинг ҳозирги ҳолати
Фарғона клуби ўтган мавсум Ўзбекистон Суперлигасида чемпионликни қўлга киритиб, узоқ йиллик танаффусдан кейин мамлакатнинг энг кучли жамоаси мақомига қайтган эди.
Жорий мавсумда ҳам "Нефтчи" юқори ўринлар учун курашмоқда. Суперлиганинг 23-туридан сўнг фарғоналиклар 52 очко билан турнир жадвалида иккинчи ўринни эгаллаб турибди. Пешқадам "Пахтакор" ҳам худди шунча очко жамғарган, жамоаларни ўзаро ўйинлардаги натижа ажратиб турибди.
"Нефтчи" сўнгги турда "Хоразм" билан 2:2 ҳисобида дуранг ўйнади. Шунга қарамай, жамоа барча мусобақалардаги охирги тўртта учрашувида мағлубиятга учрамаган ва уларнинг учтасида ғалаба қозонган.
Фарғоналиклар учун Зоран Марушичнинг ҳужумдаги самарадорлиги, Икром Алибоевнинг майдон марказидаги тажрибаси ва жамоавий интизом муҳим аҳамият касб этади.
"Ан-Наср": юлдузли таркиб ва ўз майдонидаги устунлик
Саудия Арабистони клубига австралиялик мутахассис Ангелос Постекоглу бош мураббийлик қилмоқда.
Жамоа таркибида Криштиану Роналду, Садио Мане, Жоау Феликс, Кингсли Коман, Иниго Мартинес ва Муҳаммад Симакан каби халқаро миқёсда катта тажриба тўплаган футболчилар бор.
"Ан-Наср" 8 октябрь куни Саудия Арабистони чемпионатида "Ал-Дирия"ни 3:0 ҳисобида мағлуб этди. Ушбу баҳсда Криштиану Роналду, Саму Кошта ва Кингсли Коман гол уришди.
Мезбонларнинг ўз майдонидаги натижалари ҳам эътиборга молик. Жамоа мавсум бошидан буён "Ал-Аввал Парк" стадионида ўтказган тўртта учрашувининг барчасида ғалаба қозонган. Уларда рақиблар дарвозасига 10 та гол киритиб, бор-йўғи икки тўп ўтказиб юборган.
Мазкур кўрсаткичлар "Нефтчи"ни ҳимояда ўта эҳтиёткор ва тартибли ҳаракат қилишга ундайди.
Таркибдаги йўқотишлар
"Ан-Наср" бўлажак учрашув олдидан айрим кадрлар билан боғлиқ муаммоларга дуч келган.
Ўнг қанот ҳимоячиси Султон Ал-Ғаннам оғир тизза жароҳатидан тикланиш жараёнини давом эттирмоқда. Солим Ал-Наждий ҳам жароҳати туфайли сўнгги ўйинларни ўтказиб юборган.
Шунингдек, Аввад Аман ва Абдуллоҳ Ал-Амрининг жисмоний ҳолати борасида саволлар мавжуд.
"Нефтчи" таркибида эса Йован Жокичнинг жароҳати асосий йўқотишлардан бири бўлиб турибди. Сербиялик футболчи жарроҳлик амалиётидан кейин тикланиш жараёнини ўтамоқда.
Исломбек Исмоилов: "Биз фақат Роналдуга қарши ўйнамаймиз"
"Нефтчи" бош мураббийи Исломбек Исмоилов ўйинолди матбуот анжуманида рақибнинг кучли жиҳатларини эътироф этди. Шу билан бирга, фарғоналиклар Ар-Риёдга муносиб натижа учун ташриф буюрганини таъкидлади.
"Биз Ар-Риёдга шунчаки майдонга тушиб, ўйин ўтказиш учун эмас, балки муносиб натижага эришиш мақсадида келганмиз. Рақибнинг кучини яхши тушунамиз, шу билан бирга, ўз имкониятларимизга ҳам ишонамиз", — деди мутахассис.
Исмоилов Криштиану Роналдуга қарши алоҳида режа ишлаб чиқилгани ҳақидаги саволга ҳам жавоб берди.
"Биз фақат Роналдуга қарши эмас, балки бутун "Ан-Наср" жамоасига қарши ўйнаймиз. Шу сабабли асосий эътиборимиз рақибнинг умумий ўйинига, жамоавий ҳаракатларига ва майдондаги вазиятларга қаратилади", — деди бош мураббий.
Икром Алибоев: "Охиригача курашамиз"
Фарғона клуби ярим ҳимоячиси Икром Алибоев ҳам жамоанинг бўлажак баҳсга тайёргарлиги ҳақида гапирди.
"Ал-Наср" нафақат таркиб жиҳатидан, балки молиявий имкониятлари ва халқаро тажрибаси билан ҳам қитъамизнинг етакчи клубларидан бири ҳисобланади.
Биз бўлажак учрашувга жиддий тайёргарлик кўрдик. Футболда номлар ва имкониятлар муҳим, лекин майдонда ҳар бир жамоа ўз ўйини ва кураши билан натижага эришади.
Бор кучимизни ишга солиб, мухлисларимизни қувонтирадиган натижага эришишга ҳаракат қиламиз. Бизнинг вазифамиз — майдонда боримизни бериш, охиригача курашиш", — деди Алибоев.
Ўйин тақдирини нималар ҳал қилиши мумкин?
"Ан-Наср" таркибидаги футболчиларнинг индивидуал маҳорати мезбонларга ҳужумда катта устунлик беради. Айниқса, Роналдунинг жарима майдони ичидаги ҳаракатлари, Феликснинг ҳужумларни ташкил этиши, Мане ва Команнинг тезкорлиги "Нефтчи" ҳимояси учун жиддий синов бўлади.
Фарғоналиклар учун эса майдон марказида рақибга ортиқча ҳудуд қолдирмаслик, ҳимоя чизиқлари ўртасидаги масофани сақлаш ва тўпни эгаллаб олгач, тезкор қарши ҳужумларга ўтиш муҳим.
Шунингдек, стандарт вазиятлар ҳам меҳмонлар учун гол уриш имкониятларидан бири бўлиши мумкин.
"Нефтчи" биринчи турдаги каби ҳимояда интизомли ҳаракат қилиб, юзага келадиган имкониятлардан самарали фойдалана олса, номдор рақибига жиддий қаршилик кўрсатиши мумкин.
Учрашув ҳақида маълумот
Осиё Чемпионлар лигаси Элит турнири. Ғарб минтақаси, 2-тур
Сана: 12 октябрь, 2026 йил
Учрашув: "Ан-Наср" (Саудия Арабистони) — "Нефтчи" (Ўзбекистон)
Стадион: "Ал-Аввал Парк", Ар-Риёд
Бошланиш вақти: 23:15 (Тошкент вақти билан)
Бош ҳакам: Ма Нин (Хитой)
VAR ҳаками: Фу Мин (Хитой)
