«Барселона»нинг собиқ ярим ҳимоячиси Жерар Лопес «Реал» ҳужумчиси Винисиус Жуниорнинг Испания Ла Лигаси 8-турида «Вильярреал»га қарши ўйинда (1:0) майдондан четлатилишига муносабат билдирди.

Учрашувнинг 72-дақиқасида бразилиялик футболчи ҳужум пайтида рақиб ярим ҳимоячиси Натан Салибанинг сочидан тортди. VAR текширувидан сўнг бош ҳакам Исидро Диас де Мера Винисиуснинг голини бекор қилди ва унга тўғридан-тўғри қизил карточка кўрсатди.

Жерар Лопес Movistar Plus телеканали эфирида ушбу вазиятни кескин танқид қилди.

«Менимча, бу хунук, ифлос ва жирканч ҳаракат. Бу менга болалигимизда мактаб ҳовлисида футбол ўйнаган пайтларимизни эслатди. Ўшанда кимдир шундай қилса, албатта, муштлашув келиб чиқарди.

Бу воқеа «Сантьяго Бернабеу»да содир бўлгани, унда Винисиус иштирок этгани ва вазият гол билан боғлиқ бўлгани учун ортиқча шов-шувга сабаб бўлди.

Аммо бу ерда ҳеч қандай баҳсли ҳолат йўқ. Бу қизил карточка кўрсатилиши шарт бўлган яққол вазият», — деди Лопес.

Шу тариқа, «Барселона»нинг собиқ футболчиси ҳакамнинг Винисиусни майдондан четлатиш ҳақидаги қарорини тўлиқ қўллаб-қувватлади.