«Галатасарой» бош мураббийи Окан Бурук УЕФА Чемпионлар лигаси доирасида «Барселона»га қарши ўтказиладиган учрашув олдидан ўз фикрларини билдирди.

Туркиялик мутахассис рақибнинг юқори савиясини эътироф этган ҳолда, жамоаси фақат ҳимояланиш билан чекланмаслигини ва ҳужумкор футбол намойиш этишини таъкидлади.

«Барселона»га қарши ўйин ҳақида

«Айни пайтда «Барселона»ни дунёнинг энг яхши формадаги жамоаси деб айтишимиз мумкин. Албатта, ҳамма уларни ушбу баҳснинг фаворити деб ҳисоблайди.

Бироқ улар ўз кучига ва ғалабага ишончи баланд бўлган «Галатасарой»га қарши майдонга тушишади.

Биз — «Галатасарой»миз ва ўз майдонимизда ўйнаймиз! Шунинг учун қандай тактик тизимдан фойдаланишимиздан қатъи назар, рақибга қарши тажовузкор ҳаракат қилишимиз шарт.

«Барселона»га қарши фақат ҳимояланиб ўтирмаймиз. Биз ҳужум ҳам қиламиз», — деди Бурук.

Илкай Гюндоган билан боғлиқ вазият

Шунингдек, мураббий «Барселона»нинг собиқ ярим ҳимоячиси Илкай Гюндоган ҳақида ҳам гапирди. Немис футболчиси «Қосимпошо»га қарши учрашувда захирада қолдирилганидан норозилигини билдирган эди.

Бурук ушбу ҳолатни жиддий муаммо деб ҳисобламаслигини таъкидлади.

«Илкай машғулотларда доимо юқори даражада ишлайди ва майдонга тушишга тайёр. Мен ундан жуда мамнунман.

Футболчилар робот эмас, улар ҳам инсон. Бундай катта тажрибага эга ўйинчи хафа бўлганида, баъзан ўз ҳиссиётларини намоён қилиши табиий.

Бундай ҳолатларга ортиқча эътибор қаратишимиз керак эмас», — деди мутахассис.

Учрашув олдидан

Тўрт марта Туркия Суперлигаси чемпиони бўлган Окан Бурук энди «Галатасарой» билан Европа майдонида ҳам юқори натижаларга эришишни мақсад қилган.

Истанбул клуби Чемпионлар лигасидаги аввалги учрашувида Лиссабонда «Спортинг»га 1:3 ҳисобида мағлуб бўлган эди.

«Барселона» эса гуруҳдаги асосий фаворитлардан бири сифатида қаралмоқда.

«Галатасарой» — «Барселона» учрашуви 13 октябрь, сешанба куни Истанбулдаги «Али Сами Йен» стадионида бўлиб ўтади.

Баҳс Тошкент вақти билан 14 октябрга ўтар кечаси соат 00:00 да бошланади.