Аргентина терма жамоаси билан жаҳон чемпиони бўлган Хулиан Альварес Мадриднинг "Атлетико" клубини тарк этиб, фаолиятини Лондоннинг "Арсенал" жамоасида давом эттириши мумкин.
Бу ҳақда TEAMtalk нашри хабар бермоқда.
Манба маълумотига кўра, "Арсенал" ўтган ёзда ҳам аргентиналик ҳужумчини ўз сафига қўшиб олишга қизиқиш билдирган. Ўшанда "Атлетико" футболчини қўйиб юборишга тайёр бўлган, бироқ Альвареснинг ўзи "Барселона"га ўтишни истаган.
Мадрид клуби раҳбарияти эса Ла Лигадаги бевосита рақобатчиси билан трансфер бўйича музокара олиб боришдан бош тортган.
Қайд этилишича, Альварес ҳали ҳам "Атлетико"да узоқ муддат қолиш истиқболидан қониқмаяпти. Шу сабабли у энди "Арсенал" билан музокара ўтказишга тайёр.
Лондонликлар 26 ёшли ҳужумчининг трансфери учун 100 миллион фунт стерлинг (118 миллион евро) тўлаши мумкин.
Жорий мавсумда Альварес Испания Ла Лигасида тўртта учрашувда иштирок этди. Бироқ у ҳали бирор марта асосий таркибда майдонга тушмади ва гол ёки голли узатма қайд этмади.
Аргентиналик футболчининг "Атлетико" билан амалдаги шартномаси 2030 йилнинг ёзига қадар мўлжалланган.
Transfermarkt портали Альвареснинг бозор қийматини 110 миллион еврога баҳоламоқда.
