«Астон Вилла» бош мураббийи Унаи Эмери УЕФА Чемпионлар лигаси умумий босқичида жамоасининг кучли саккизликка кириш имкониятлари ҳақида фикр билдирди.

Испаниялик мутахассис «Фенербахче»га қарши ўйин олдидан ўтказилган матбуот анжуманида мусобақада юқори натижа қайд этиш учун барқарор ўйин кўрсатиш ва ғалабалар сонини ошириш муҳимлигини таъкидлади.

«Биз Чемпионлар лигасидаги дастлабки учрашувимизда ғалаба қозондик. Бироқ навбатдаги баҳс биз учун янги синов бўлади.

Умумий босқични кучли саккизликда якунлаш — ниҳоятда катта ютуқ. Бунга эришиш учун яна беш ёки олтита учрашувда ғалаба қозонишимиз керак», — деди Эмери.

Маълумот учун, «Астон Вилла» Чемпионлар лигасининг жорий мавсумини Бельгиянинг «Брюгге» клуби устидан қозонилган 3:2 ҳисобидаги ғалаба билан бошлаган.

Бирмингемликлар умумий босқичнинг 2-турида Туркиянинг «Фенербахче» жамоасини ўз майдонида қабул қилади.

Учрашув 14 октябрь куни бўлиб ўтади ва Тошкент вақти билан 15 октябрга ўтар кечаси соат 00:00 да бошланади.

Эслатиб ўтамиз, Чемпионлар лигасининг амалдаги форматига кўра, умумий босқични дастлабки саккиз ўринда якунлаган жамоалар тўғридан-тўғри 1/8 финалга йўл олади. 9–24-ўринларни эгаллаган клублар эса ушбу босқичга чиқиш учун қўшимча плей-офф ўйинларида қатнашади.