«Aston Villa» bosh murabbiyi Unai Emeri UEFA Chempionlar ligasi umumiy bosqichida jamoasining kuchli sakkizlikka kirish imkoniyatlari haqida fikr bildirdi.

Ispaniyalik mutaxassis «Fenerbaxche»ga qarshi o‘yin oldidan o‘tkazilgan matbuot anjumanida musobaqada yuqori natija qayd etish uchun barqaror o‘yin ko‘rsatish va g‘alabalar sonini oshirish muhimligini ta’kidladi.

«Biz Chempionlar ligasidagi dastlabki uchrashuvimizda g‘alaba qozondik. Biroq navbatdagi bahs biz uchun yangi sinov bo‘ladi.

Umumiy bosqichni kuchli sakkizlikda yakunlash — nihoyatda katta yutuq. Bunga erishish uchun yana besh yoki oltita uchrashuvda g‘alaba qozonishimiz kerak», — dedi Emeri.

Ma’lumot uchun, «Aston Villa» Chempionlar ligasining joriy mavsumini Belgiyaning «Bryugge» klubi ustidan qozonilgan 3:2 hisobidagi g‘alaba bilan boshlagan.

Birmingemliklar umumiy bosqichning 2-turida Turkiyaning «Fenerbaxche» jamoasini o‘z maydonida qabul qiladi.

Uchrashuv 14 oktyabr kuni bo‘lib o‘tadi va Toshkent vaqti bilan 15 oktyabrga o‘tar kechasi soat 00:00 da boshlanadi.

Eslatib o‘tamiz, Chempionlar ligasining amaldagi formatiga ko‘ra, umumiy bosqichni dastlabki sakkiz o‘rinda yakunlagan jamoalar to‘g‘ridan-to‘g‘ri 1/8 finalga yo‘l oladi. 9–24-o‘rinlarni egallagan klublar esa ushbu bosqichga chiqish uchun qo‘shimcha pley-off o‘yinlarida qatnashadi.