«Манчестер Юнайтед» ҳимоячиси Лисандро Мартинес Чемпионлар лигасидаги мағлубиятдан сўнг клуб раҳбариятини кескин танқид қилди.

Сешанба куни «Манчестер Юнайтед» Мадридда «Атлетико»га 0:2 ҳисобида имкониятни бой берди. Мезбонлар Пабло Барриоснинг 1-дақиқада урган голи эвазига ҳисобда олдинга чиқди. 79-дақиқада эса Адемола Лукман учрашувдаги якуний ҳисобни ўрнатди.

«Жуда ёмон, жуда ёмон. Ўзимни босишга мажбурман, аммо бу ҳолат клубимиз қандай вазиятда эканини кўрсатиб турибди.

Биз ўтган мавсумни ажойиб якунладик, лекин таркибни кучайтиришимиз керак. Чунки рақобатчиларимиз ҳам янги футболчиларни сотиб олишмоқда. «Атлетико» ажойиб жамоа ва улар ғалабага муносиб эди.

Ҳа, мен клубдан трансфер бозорига кўпроқ сармоя киритишини кутяпман. Техник директоримиздан ҳам кўпроқ нарса кутаман.

Биз майдонда яхшироқ ўйнашимиз керак, аммо таркибимиз ҳам муносиб даражада бўлиши муҳим.

Мураббийни танқид қилишмоқда, лекин муаммо унга етарлича ёрдам кўрсатилмаганидадир, балки? У қўлидан келган барча ишни қилмоқда. Мураббийларни доимий равишда алмаштиравериш мумкин эмас», — дея аргентиналик футболчининг сўзларини келтирмоқда BBC.

«Манчестер Юнайтед» Англия Премьер-лигасида олтита турдан сўнг 6 очко билан 13-ўринни эгаллаб турибди.