«ПСЖ» ҳужумчиси Усмон Дембеле Европа Чемпионлар лигаси умумий босқичининг 2-турида «Манчестер Сити» устидан қозонилган 4:2 ҳисобидаги ғалабадан сўнг ўз фикрларини билдирди.
Парижликлар Англияда кечган учрашувда мезбонларни мағлубиятга учратди. Дембеле эса жамоасининг голларидан бирига муаллифлик қилди.
Франциялик футболчи Canal+ телеканалига берган интервьюсида жамоасининг ўйини, танқидларга муносабати ва сўнгги вақтлардаги таътили ҳақида гапирди.
«Одамларнинг бизга шубҳа қилгани аҳамиятсиз»
«Одамлар бизга шубҳа билан қарагани бизни мутлақо қизиқтирмайди. Ҳозир октябрь ойи, Чемпионлар лигасида атиги иккинчи учрашувимизни ўтказдик ва бор эътиборимизни ўз вазифаларимизга қаратганмиз.
Мавсумнинг биринчи қисмида юқори савияни сақлаб қолишимиз кераклигини яхши тушунамиз. Кейин эса мавсумнинг иккинчи ярмига тайёргарлик кўрамиз.
Бугун биринчи бўлимни яхши ўтказдик. Иккинчи бўлимда эса бироз қийналдик, чунки сал бўшашиб қолдик. Аммо бу ўйиндан ижобий жиҳатларни эслаб қоламиз», — деди Дембеле.
«Балки яна бир марта таътил сўрарман»
Футболчи сўнгги вақтларда ўзига нисбатан билдирилган танқидларга ҳам муносабат билдирди. У бу борада ортиқча изоҳ беришни истамаслигини таъкидлаб, таътил мавзусида ҳазил қилди.
«Бирор нарсага ойдинлик киритишни хоҳлайманми? Йўқ, асло.
Терма жамоалар ўйинлари учун танаффус бўлди, шундан кейин мен таътилга чиқдим.
Айтганча, балки яна бир марта таътил сўрарман», — деди Дембеле кулиб.
«Мени ўн йилдан бери танқид қилиб келишади. Бу борада бирор нарса ўзгаришига ишонишим қийин», — дея қўшимча қилди франциялик ҳужумчи.
Эслатиб ўтамиз, Усмон Дембеле ўтган дам олиш кунлари «ПСЖ»нинг Франция чемпионати доирасидаги учрашувида иштирок этмаган эди.
