«Барселона» бош мураббийи Ҳанс-Дитер Флик жорий мавсумда ҳали майдонга тушмаган Френки де Йонг ҳақида фикр билдирди. Де Йонг жароҳатидан тикланди ва шанба куни «Бетис»га қарши ўйинда иштирок этишга тайёр.

«Френки — юқори даражадаги футболчи. Унинг қайтганидан жуда хурсандман. У жароҳатдан энди қайтгани учун унинг ҳолатидаги ўзгаришларни кузатиб боришимиз керак. Эртага у ўйин вақтига эга бўлишга тайёр бўлади», — деди Флик.

— Де Йонгнинг марказий ҳимояда ўйнаши ҳақида нима дейсиз?

«Биз уни бу позицияда унчалик кўп синаб кўрмадик. Асосан, фақат чекланган ҳудуддаги икки томонлама машғулотлар пайтида шундай қилганмиз. У машғулотларда бор кучини сарфлайди ва ўз имкониятларини кўрсатишни хоҳлайди. У бизга жуда кўп вариантларни тақдим этади.

Албатта, мен футболчиларнинг жисмоний юкламасини тўғри тақсимлашим керак, бу эса осон эмас. Асосий таркибда майдонга тушадиган футболчилар бу ўринга лойиқ эканликларини исботлашлари керак», — деди Флик матбуот анжуманида.

«Барселона» Ла Лига турнир жадвалида пешқадамлик қилмоқда. Жамоа саккизта турдан кейин мумкин бўлган 24 очконинг барчасини қўлга киритган.