«Рома» клуби ва Италия терма жамоасининг собиқ ҳужумчиси Франческо Тотти замонавий футболга муносабатини билдириб, бугунги футболда юз бераётган ўзгаришларни танқид қилди.
— Замонавий футбол ҳақидаги китобингизда анча кескин иборани ишлатгансиз: «Буларнинг барчаси жонимга тегди!»
— Мен футболчиларни эмас, балки футбол муҳитини назарда тутганман. Мухлис ва футболчи сифатида мен билган футболда клуб либосига муҳаббат, садоқат ва ўзини жамоанинг бир қисми деб ҳис қилиш туйғуси анча кучли эди.
Ҳозир эса футбол кўпроқ бизнесга айланиб қолди. Ўйинда техник маҳоратнинг аҳамияти камайиб, жисмоний кучга бўлган талаб ортиб бормоқда.
Бугун, қанчалик афсусланарли бўлмасин, ўзининг техник маҳорати билан кишини ҳайратга сола оладиган футболчини топиш қийин.
Ҳозирги футболчиларда жисмоний куч, тезлик ва қудрат бор. Аммо истеъдод, ижодкорлик ва фантазия анча камайган, — деди Тотти.
