Мадриднинг «Реал» клуби мухлислари Испания Ла Лигасининг 9-турида «Севилья»га қарши ўтказилган учрашувда «Барселона»га қаратилган провокацион баннер намойиш этишди.

Якшанба куни «Сантьяго Бернабеу» стадионида бўлиб ўтган баҳс мадридликларнинг 4:1 ҳисобидаги йирик ғалабаси билан якунланди.

Madrid Zone нашрининг хабар беришича, учрашув давомида «Реал» мухлислари трибуналардан бирига «Барселона»га ишора қилувчи плакат жойлаштиришган.

Баннерда «Бу футбол эмас. Бу Тебас ва Негрейра» деган ёзув акс этган.

Эътиборлиси, Испания Ла Лигаси президенти Хавьер Тебас ва собиқ ҳакамлар қўмитаси вице-президенти Хосе Мария Энрикес Негрейранинг фамилиялари «Барселона» клубига хос кўк-анор рангларда ёзилган.

Айни пайтда «Барселона» Испания чемпионати турнир жадвалида 27 очко билан пешқадамлик қилмоқда.

Мадриднинг «Реал» клуби эса 21 очко жамғарган ҳолда учинчи ўринни эгаллаб турибди. Иккинчи поғонада 22 очко билан «Атлетико» жойлашган.

Қайд этиш жоиз, 25 октябрь, якшанба куни Испания чемпионатининг навбатдаги «эл-класико» учрашуви бўлиб ўтади.

Мазкур баҳсда «Реал» сафарда «Барселона»га қарши майдонга тушади.