"Арсенал" бош мураббийи Микель Артета Англия Премьер-лигасининг 7-турида "Ноттингем Форест" устидан қозонилган ғалабага муносабат билдирди.

Лондонликлар сафарда кечган учрашувда рақибини 1:0 ҳисобида мағлуб этиб, муҳим уч очкони қўлга киритишди.

Артетанинг таъкидлашича, жамоаси ғалаба учун сўнгги сонияларгача курашишига тўғри келган.

"Олдинги ўйинда ғалаба қозона олмагандик, аммо бу сафар мақсадимизга эришдик.

Биз сўнгги сониягача курашдик. Рақиб яхши тайёрланган жамоа, унинг ҳимоясини ёриб ўтиш осон эмас.

Таваккал қилишимизга тўғри келди, чунки рақиб жуда хавфли эди. Шунингдек, ҳиссий босимни ҳам енгиб ўтишимиз керак эди.

Футболчиларимиз бутун учрашув давомида диққатни йўқотишмади. Захирадан майдонга тушган ўйинчилар эса баҳснинг боришига катта таъсир кўрсатишди", — дея Артетанинг сўзларини келтиради BBC.

Қайд этиш жоиз, "Арсенал" еттита турдан сўнг 18 очко билан Англия чемпионати турнир жадвалида иккинчи ўринни эгаллаб турибди.

Лондонликлар пешқадам "Манчестер Сити"дан уч очко ортда қолмоқда.