Мадриднинг «Реал» клуби «Севилья»га қарши уй учрашувларидаги юқори сермаҳсуллигини яна бир бор намойиш этди.

Испания чемпионатининг 9-турида «қироллик клуби» андалусияликларни «Сантьяго Бернабеу» стадионида 4:1 ҳисобида мағлуб этди.

Эътиборлиси, «Реал» «Севилья»га қарши Мадридда ўтказилган сўнгги 18 та ўйиннинг 17 тасида рақиб дарвозасига камида иккитадан гол киритишга муваффақ бўлган.

Мазкур серияда мадридликлар фақат 2024 йилнинг февраль ойида икки ёки ундан ортиқ гол ура олмаган. Ўшанда Лука Модричнинг 81-дақиқада киритган ягона тўпи «Реал»га 1:0 ҳисобидаги ғалабани тақдим этганди.

Бу галги учрашувда эса Арда Гюлер 30-дақиқада ҳисобни очди. Килиан Мбаппе 37 ва 63-дақиқаларда дубль қайд этди. «Севилья» сафида Буэно 80-дақиқада жавоб голини урган бўлса, 82-дақиқада Ян Диоманде якуний ҳисобни ўрнатди.

Учрашувни бош ҳакам Матео Бускетс Феррер бошқарди.

Айни пайтда «Реал» 21 очко билан Ла Лига турнир жадвалида учинчи ўринда бормоқда ва «Барселона»дан 6 очко ортда қолмоқда. «Севилья» эса 14 очко билан олтинчи поғонада жойлашган.

Мадридликлар навбатдаги турда айнан «Барселона»га қарши майдонга тушади.