«Атлетик» ҳужумчиси Нико Уильямснинг агенти Феликс Тайнта футболчига «Ливерпуль» ва «Арсенал» қизиқиш билдирганини тасдиқлади.

Агентнинг таъкидлашича, Испания терма жамоаси аъзосини ўз сафига қўшиб олишни истаган клублар кўп бўлган. Бироқ Уильямс якунда Бильбаода қолишга қарор қилган.

«Никони ҳамма хоҳларди. Футболчини бундай клубларнинг барчасига рад жавобини беришга кўндириш осон эмас.

Европа чемпионатидан кейинги ёзда жуда жиддий алоқалар бўлганди. Кейинги ёзда эса қизиқиш янада кучайди», — деди Тайнта.

Шунингдек, агент Уильямснинг ўзи ҳам фаолиятида янги босқичга қадам қўйишни истаганини яширмади.

«У катта мақсадларга эга футболчи. “Атлетик”да ўйнасангиз, клубнинг имкониятлари чекланганини тушунасиз. Бу жамоа билан Чемпионлар лигасида ғолиб чиқиш қийин, Испания чемпионлигини қўлга киритиш ҳам осон эмас», — дея қўшимча қилди у.

Эслатиб ўтамиз, 2024 йилнинг ёзида Уильямсга «Барселона», «Бавария» ва «ПСЖ» ҳам қизиқиш билдирган, аммо футболчи «Атлетик» билан шартномасини узайтирган.

Уильямс Бильбао клуби сафида 205 та учрашув ўтказиб, 38 та гол урган ва 37 та голли узатма амалга оширган.

Шунингдек, у Испания терма жамоаси билан 2024 йилги Европа чемпионатида ғолиб чиққан.