Мюнхеннинг «Бавария» клуби ҳимоячиси Саша Боэ жорий мавсумда илк бор расмий учрашувда майдонга тушди. Шунга қарамай, немис гранди француз футболчисини қишки трансфер ойнасида сотиш ниятидан воз кечмаган.

26 ёшли ҳимоячи Бундеслигада «РБ Лейпциг»га қарши кечган ва мюнхенликларнинг 6:1 ҳисобидаги йирик ғалабаси билан якунланган учрашувнинг 77-дақиқасида захирадан ўйинга қўшилди. У Ким Мин Жэнинг ўзини ноқулай ҳис қилгани сабаб майдонга тушиш имкониятига эга бўлди.

«Саша машғулотларда бор кучини сарфлаб ишлаяпти. Унга эҳтиёж туғилганда, майдонга тушишга тайёр эди. Мураббий уни меҳнати учун муносиб тақдирлади. Бу қувонарли ҳолат», — деди клуб спорт директори Макс Эберль.

Аслида, «Бавария» ўтган ёздаёқ Боэ билан хайрлашишни режалаштирганди. Ҳимоячи аввалги мавсумнинг иккинчи ярмини «Галатасарой»да ижара асосида ўтказган, аммо турк клуби уни 15 миллион еврога сотиб олиш ҳуқуқидан фойдаланмаган.

Эътиборлиси, «Лейпциг»га қарши баҳс Боэ учун Венсан Компани бошқарувида «Бавария»нинг Бундеслига ўйини қайдномасига киритилган иккинчи ҳолат бўлди.

Мюнхенликлар ҳимоячини январда сотишни режалаштирмоқда. Клуб бу трансферда сезиларли молиявий йўқотишларга ҳам рози бўлиши мумкин.

Боэнинг «Бавария» билан амалдаги шартномаси 2028 йилгача мўлжалланган.