«Манчестер Сити»нинг ганалик қанот ҳужумчиси Антуан Семеньо жароҳати сабаб тахминан икки ой давомида майдонга тушмаслиги мумкин.
Футболчи Англия Премьер-лигасида «Ипсвич»га қарши кечган ва «шаҳарликлар»нинг 3:2 ҳисобидаги ғалабаси билан якунланган учрашувда оёғидан зарба олиб, жароҳатланди. Семеньо ушбу баҳсда атиги 13 дақиқа ҳаракат қилди.
«Манчестер Сити» бош мураббийи Энцо Мареска футболчининг ҳолати, шунингдек, Эрлинг Холанднинг майдонга қайтиш эҳтимоли ҳақида маълумот берди.
«Холанд ўйинга тайёр бўлиши мумкин, буни ҳали кўрамиз. Унинг ҳолати борасида айрим шубҳалар бор. Кеча анча яхши кўринди, аҳволи ҳам яхшиланган.
Қолган футболчиларнинг ҳолати деярли яхши. Фақат Антуан тахминан саккиз ҳафтага сафдан чиққан бўлиши мумкин.
Дастлаб унинг жароҳати анча жиддий бўлишидан хавотир олгандик. Аммо кечаги тиббий текширув натижаларидан кейин анча хотиржам бўлдик. Чунки жароҳат биз ўйлагандек оғир эмас экан.
Тикланиш жараёни саккиз ҳафтагача давом этиши мумкин. Ҳозир у учун энг муҳими — соғайиб олиш. Тахминан декабрь ойида у яна сафимизда бўлади», — дея Маресканинг сўзларини келтиради City Xtra.
