"Манчестер Юнайтед"нинг собиқ ҳимоячиси Рио Фердинанд Криштиану Роналдунинг танқидларга муносабати ва муваффақиятга интилиши ҳақида фикр билдирди.
Фердинанднинг таъкидлашича, португалиялик юлдуз ўзига қаратилган салбий фикрларни ҳам янги ютуқларга эришиш учун мотивацияга айлантира олади.
"У мукаммалликка интилишга қаттиқ берилган. Агар кимдир Роналду ҳақида ноўрин гап айтса, у бундан албатта хабар топади ва бу унга таъсир қилади.
Криштиану ўзи ҳақидаги бундай изоҳларни ҳатто махсус излаб топади, уларни чуқур таҳлил қилади ва олдинга интилиш учун қўшимча кучга айлантиради.
Одамлар уни танқид қилиш ёки обрўсини тушириш мақсадида салбий гаплар айтганида ҳам, Роналду бундан ўз фойдасига фойдаланади", — дея Фердинанднинг сўзларини келтиради derbyderbyderby.it.
Эслатиб ўтамиз, Рио Фердинанд ва Криштиану Роналду 2003–2009 йилларда "Манчестер Юнайтед" сафида бирга тўп сурган.
