"Байер" ҳужумчиси Штефан Кисслинг "Хоффенхайм" дарвозасига "урган" гол юзасидан ўз фикрларини билдириб ўтди.
"Мен тўпга шунчаки зарба бердим ва шундан сўнг тўпни "Хоффенхайм" дарвоза тўрининг ичида кўрдим. Такрорлайман: тўп қандай килиб тўрга кириб қолганини кўрмадим. Ўйиндан кейин ҳакамга худди шундай дедим. Тан оламан, бўлган воқеани билганимдан кейин ўзим ҳам ҳайрон бўлиб қолдим. Бу ерда менинг айбим бор деб ўйламайман. Лекин ташқаридан қараганда вазият чиройли кўринмайди. Буниси аниқ", дейди Кисслинг.
Эслатиб ўтамиз, кеча бўлиб ўтган Германия чемпионатинининг 9-тури доирасида "Байер" "Хоффенхайм" меҳмони бўлди ва ўйиннинг 70-дақиқасида ливеркузенликлар ҳужумчиси Кисслинг томонидан бош билан берилган зарба дарвоза тўрининг ён томонидаги тешик орқали дарвоза ичига кириб кетганди. Ҳакам эса буни гол дея инобатга олди. Ўйинда "Байер" 2:1 ҳисобида ғалаба қозонди.
