Мамлакатимиз теннисчилари Германия, Туркия ва Таиландда давом этаётган нуфузли халқаро турнирларда муваффақиятли иштирок этмоқда.

Германияда ўтказилаётган халқаро турнирда йигирмадан зиёд мамлакатдан келган кучли теннисчилар қаторида ҳамюртимиз Фаррух Дўстов ҳам ғолиблик учун курашмоқда.

Моҳир теннисчимиз яккалик баҳсларининг дастлабки босқичида мезбонлар вакили Максимилиан Мартерерни 7:5, 6:4 ҳисобида мағлубиятга учратди. Ф.Дўстов кейинги даврада литвалик Рикардас Беранкисга қарши кортга чиқади.

Туркияда хотин-қизлар ўртасидаги халқаро мусобақада Нигина Абдураимова бош соврин учун курашни давом эттирмоқда. Дастлабки икки учрашувда венгриялик Река-Лука Жанини 2:6, 6:4, 6:2 ва украиналик Анастасия Васильевани 6:4, 4:6, 6:3 ҳисобида енгган теннисчимиз, ярим финалга чиқиш учун россиялик Майя Катситадзе билан куч синашади.

Таиландда ўсмирлар ва қизлар иштирокида ташкил этилган халқаро турнирда истеъдодли ёш теннисчимиз Арина Фольц иккинчи даврада мезбонлар вакили Йинглак Жит Такоат устидан 6:2, 6:1 ҳисобида зафар қучди.