2013 йил якунларига кўра ўзбекистонлик спорт журналистлари миллий терма жамоамиз аъзоси, Москванинг “Локомотив” (Россия) клуби ҳимоячиси Виталий Денисовни “Энг яхши футболчи” сифатида эътироф этишди. Кеча ўтказилган Ўзбекистон футбол федерациясининг ғолибларни тақдирлаш маросимида Виталий Денисов юксак мукофотни ташкилот раҳбари Мираброр Усмонов қўлидан қабул қилиб олди. В.Денисовнинг таъкидлашича, бу мукофот унга икки карра куч бағишлайди.

— Виталий, мукофот билан табриклаймиз. Умуман, мавсум давомида буни кутганмидингиз?
— Тўғриси, кимга нима насиб қилишини олдиндан билиб бўлмайди. Албатта, мен ҳам кутмагандим. Мен танишларимдан, мухлислардан билдим бу хабарни. Ижтимоий тармоқларда –facebook, twitter, instagram, Вконтактеда бу ҳақда ёзишди. Лекин, ўзим бунинг учун алоҳида кузатиб борганим йўқ.

Бундай юксак мукофотни қўлга киритиш мен учун жуда катта рағбатдир. Менинг кучимга куч, ғайратимга ғайрат қўшиши турган гап. Бу мени икки карра катта куч билан ҳаракат қилишга ундайди. Чунки, уни ўзимда олиб қолишим учун курашишим керакда! Одатда, энг яхши футболчига бериладиган мукофотни кўпинча ҳужумчи ва ярим ҳимоячилар олишар эди. Бу сафар мени танлашган экан, мен уларнинг ишончини оқлашга ҳаракат қиламан.

— Бу йилги мавсумда Россия чемпионатининг ҳам энг яхши ҳимоячиси сифатида тан олишди. Нима деб ўйлайсиз, сиз учун йил муваффақиятли ўтди, деб бўладими?
— Умуман, агарда биз чемпионатни энг яқин таъқибчимиздан бир поғонада юқори ўринда, яъни биринчи ўринда якунласаккина уни муваффақиятли ўтди, деб айта оламан. Шунда футболчилик фаолиятимдаги энг омадли йил бўлади.

— Терма жамоа борасида, режаларингиз қандай?
— Бу борада ҳозир ҳеч нарса дея олмайман. Биз ўз олдимиздаги учрашувларда фақат юқори мақсадлар қўйиб курашга киришамиз. Мухлисларни хурсанд қиламиз, деган умиддаман.

Янги йил арафасида барча мухлисларга мустаҳкам соғлиқ, севги ва бахт тилайман, ҳамма ишлари юришсин. Спорт билан шуғулланинг.

Норбек Ниёзов суҳбатлашди