Пойтахтимизда аёллар ўртасида футзал бўйича 10-миллий чемпионат мусобақасига старт берилди. ЎФФ қарори асосида Олий лига клублари қошида аёллар жамоасини ташкил этиш ва уларни мусобақаларда мунтазам иштирокини таъминлаш вазифаси қўйилган бўлсада, кўплаб жамоаларимиз ЎФФнинг мазкур қарорига панжа ортидан қараб келишмоқда.

Хусусан, Самарқанднинг “Динамо плюс”, Бухоронинг «Бухоро» ва Бекободнинг «Металлург» жамоалари мусобақада иштирок этишмаяпти. Биз Ўзбекистон аёллар мини ва пляж футболи ассоциацияси мутахассиси Алишер Файзиевдан мусобақага иштирок этаётган жамоалар ҳақида сўрадик.

— Алишер ака, аёллар ўртасида футзал бўйича ўтказилаётган мусобақага Олий лига клублари қошида ташкил этилган барча жамоалари иштирок этишмаяпти. Хусусан, “Динамо плюс” аёллар жамоаси нима сабабдан мусобақага иштирок этмаяпти?
— Биз ҳар доим мусобақа олдидан барча клубларга турнир ҳақида хабар берамиз. Самарқанднинг “Динамо плюс”, Бухоронинг «Бухоро» ва Бекободнинг «Металлург» жамоларига телеграмма орқали мусобақа ҳақида хабар берганмиз. Бироқ мазкур жамоаларнинг раҳбарлари мини-футбол мусобақаларига иштирок этиш учун пул ажратишмагани сабабли турнирда иштирок этишмаяпти.

— Мусобақада иштирок этиш мажбурийми ёки ихтиёрий?
— Турнирда иштирок этиш ихтиёрий. Ҳеч қандай бадал пули йўқ. Бироқ шундай бўлсада жамоалар нимагадир мусобақага иштирок этишмаяпти. Тўғриси буни ўзим ҳам тушунганим йўқ. Мусобақада барча шароитлар яратиб берилган. Жамоалар келиб ўйнашса бўлди. Гапнинг очиғи, мусобақага 10 та жамоа иштирок этаётгани бизнинг катта ютуғимиз. Мен бу жамоаларга ўз миннатдорчилигимни билдираман.

— Аёллар ўртасидаги биринчилик қачон ўтказиш режалаштирилган?
— 3 апрелдан бошлаб катта футбол бўйича миллий чемпионатимизга старт берилади. Айни пайтда чемпионатда иштирок этувчи жамоалар мавсумга қизғин тайёргарлик кўришмоқда.

Фарҳод Норбўтаев суҳбатлашди