Яқинда Филиппин пойтахти Манила шаҳрида ўтказилган Осиё Олимпия Кенгашининг навбатдаги 32-бош ассамблеясида Ўзбекистон Олимпия қўмитаси бош котиби Ойбек Қосимов ҳам иштирок этиб қайтди.

Ассамблея йил якунларига бағишлаб ўтказилган бўлиб, ундан бир кун олдин Осиё Олимпия Кенгашининг барча қўмиталари ўз йиғилишларини ўтказган. Тадбирлар чоғида келаётган йирик спорт мусобақаларига Осиёнинг барча давлатлари тайёргарлиғи аъло даражада экани таъкидланган. Жумладан Ўзбекистон ҳақида ҳам.

"Йиғилишда юртимизда олиб борилаётган барча ишлар ҳақида ижобий фикрлар билдирилди. Ҳатто айрим давлатлар биздаги 3 босқичда ўтказиладиган "Умид ниҳоллари", "Баркамол авлод" ва Универсиада спорт мусобақаларидан андоза олиш бўйича таклиф билдирдилар", - дейди Ойбек Қосимов.

Маълумот ўрнида айтиш жоиз, Ўзбекистон Олимпия қўмитаси 1993 йил сентябрь ойида Халқаро Олимпия қўмитаси томонидан расман тан олингач, юртимиз спортчилари мустақил Ўзбекистон номидан Олимпия ўйинларида иштирок этиш ҳуқуқига эга бўлди ва айни пайтга келиб Тошкентдаги "Олимпия шон-шуҳрати" музейида қишки ва ёзги Олимпиадаларнинг 6та олтин, 5та кумуш ва 10та бронза медаллари жой олган.