"Локомотив" ва "Кувайт" СК жамоалари ўртасидаги ОЧЛ саралаш баҳси соат 15:00да бошланмайдиган бўлди. Бу ҳақда "Локомотив" клуби матбуот хизмати Stadion.uz'га хабар берди.
Иккала жамоа вакиллари, ҳакамлар ва ўйин комиссари иштирокида ҳозир бўлиб ўтган кичик йиғилишда шундай қарор келинди.
Айни пайтда Тошкентда кучли қор ёғмоқда. Кеча яхши ҳолатда бўлган "Пахтакор" стадиони айни пайтда келиб яна қор билан қопланди. Қабул қилинган қарорга кўра, ёғаётган қор соат 15:00га қадар тинса, стадионни қордан тозалаш ишлари бошлаб юборилади ва ўйин 18:00да бошланади.
"Пахтакор" стадиони майдонида целофан ёзиб қўйилган бўлиб, қор тинганидан кейин у тезда йиғиштириб олинади ва майдон ўйинга тайёр бўлади.
Агар қор ёғишда давом этадиган бўлса, ўйин эртага соат 14:00га қолдирилади.
Демак, 15:00да ўйиннинг қачон ўтказилиши аниқ бўлади.
