Ўзбекистонлик фигурали учиш бўйича спортчи Миша Ге Сочи олимпиадасида ўзининг эркин дастурини қойилмақом тарзда ижро этди десак, адашмаган бўламиз. У саройга йиғилган мухлисларнинг олқишларига сазовор бўлди.

У мазкур дастур учун "Жаҳон рақс коллекцияси" (World Dance Collection) деб номланган композиция танлади.

Айни дақиқаларда эркаклар ўртасида кечаётган олимпиада мусобақасига ҳамюртимиз еттинчи бўлиб чиқди. Олимпия ўйинларига махсус тайёрлаб борган дастурини ўзи истаганидек ижро эта олди. Ҳакамлар уни жарима баллари билан жазоламагани ҳам бунинг исботи. Эркин дастур учун Миша 135.19 балл тўплади. Шундан техник элементлар учун 67,92, дастур тақдимоти учун эса 69.63 баллга эга бўлди.

Миша Ге эркин дастур бўйича мавсумдаги энг яхши натижаси (127,05)ни 8 баллга яхшилади. Шунингдек, икки йўналиш суммаси бўйича тўплаган балл (203.26) ҳам унинг учун мавсумдаги энг яхши кўрсаткич ҳисобланади.

Миша ўзидан аввал музга чиққан спорчиларнинг барчасидан ўтиб кетди. Энг яқин таъқибчиси филиппинлик Майкл Мартинесни 19 баллга ортда қолдирди.

Ҳали олдинда 17 нафар спортчи бор. Натижаларни кузатишда давом этамиз.