Россиялик Юлия Липницкая қишки Олимпиада ўйинлари тарихидаги энг ёш чемпион бўлганидан хабарингиз бор. Россия матбуотининг хабар беришича, 15 ёшли Липницкаянинг чемпион бўлганидан кейин мамлакатдаги қизлар орасида фигурали учишга қизиқиш кескин ортган.
Live News телеканали ўзига хос сўровнома ўтказишга ва яна бир 8 ёшли юлдузча билан танишишга муваффақ бўлди.
Лиза Элизарова атиги 8 ёшда бўлишига қарамай, 4 йилдан буён фигурали учиш билан шуғулланади. У аллақачон иккиталик сакрашни амалга оширмоқда. Қизалоқ мактабдан қайтиши билан машғулотларга зўр беради.
«Мен машҳур спортчи бўлишни ва Сочидаги Олимпиадада қатнашишни хоҳлайман»,- дейди Лиза.
Шу ўринда таъкидлаш жоизки, энг ёш Олимпиада чемпиони бўлган Юлия Липницкая Екатеренбургда туғилган ва спорт билан 4 ёшидан шуғулланиб келади. Жамоавий баҳсларда энг юқори балл олиб, Олимпиада чемпиони бўлган кунининг эртасига Россия спорт вазири Виталий Мутко унга хизмат кўрсатган спортчи унвонини бериш тўғрисидаги буйруққа имзо чекди.
