Яшил майдон қиролларининг майдондан ташқарида нималар билан машғул бўлиши кўпчиликни қизиқтирса керак, албатта. Ана шундай машҳур футболчиларнинг севимли машғулотлари ҳақида тўхталиб ўтамиз.
1. Криштиану Роналду. Хоббиси — куйлаш
Португалиялик юлдуз майдонда футбол ўйнашни қанчалик қойиллатса, қўшиқ айтишни ҳам шунчалик маромига етказар экан. Айниқса, баланд овозда хиргойи қилиш унинг жону дили. Овоз тембри имкониятлари эса бунга имконият бераркан.
2. Юрий Жирков. Хоббиси — жаҳон уруши билан боғлиқ бўлган нарсаларни йиғиш. 2009 йилда Юрий Жирков “Спорт-Экспресс” мухбири билан бўлиб ўтган суҳбатда ўзининг янги севимли машғулоти ҳақида гапириб ўтди. Унинг айтишича, жаҳон уруши ҳақидаги гаплар, умуман, уруш атрофидаги фикрлар Жирковга қаттиқ таъсир қилган. Шундан сўнг у айнан урушда ишлатилган буюмларни коллекция қила бошлади. Баъзиларини сотиб олди, баъзиларини эса Жирковнинг бу қизиқишини пайқаган яқинлари совға қилишди. Коллекцияси ҳақида футболчининг ўзи шундай дейди: “Ҳозир Калининградда уй қуряпман ва, албатта, у ерда кичкина музей ҳам бўлади. Агар сизда урушга оид нимадир бўлса, илтимос, менга совға қилинг”.
3. Андрей Шевченко ва Тео Уолкотт. Хоббилари — гольф ўйнаш
Умуман олганда, ғарбда жуда кенг тарқалган спорт тури ҳисобланади. Қарангки, бу оммавийлик Шевченко ва Уолкоттни ҳам четлаб ўтмади. Украин ва инглиз футболчилари бўш вақтларини гольфга сарфлашади. Ҳатто бир сафар Шевченко гольф бўйича жаҳон чемпионатида қатнашмоқчи ҳам бўлди. Аммо бу орзуси амалга ошмай қолган. Тео Уолкотт эса гольф билан фақат севимли машғулот сифатида шуғулланади.
4. Петр Чех. Хоббиси — тил ўрганиш ва зарбли чолғу асбобларини чалиш. “Челси” дарвозабони бу хоббисини касбий зарурат сифатида изоҳлади. “Мен кўп мамлакатларга бораман. Албатта, ўша мамлакат тилида гаплашишга мажбурсиз. Шунинг учун имкон қадар кўпроқ тилни ўрганишга интиламан. Мен бирор бир сўзни нотўғри талаффуз қилишни хоҳламайман. Француз ва инглиз тилларини тўлиқ биламан. Шунингдек, немисчани ўрганяпман. Охирги икки йилдан бери эса испан тилини бўйича машғулотга қатнаяпман. Словак, рус, португал тилларида қийналиб гапираман. Итальян ва япон тилларини эса ҳали ўрганмадим, бу тилдаги айрим ибораларни биламан, холос. Русчани ўрганишга улгурмадим, Алексей Смертин Англияда ўйнаганида ундан рус тилини ўрганишга киришгандим, аммо бу охиригача етмади. Итальян тилини эса Кудичинидан ўрганганман, ҳозир у билан итальян тилида суҳбатлашамиз. Чехиялик посбон, шунингдек, зарбли чолғу асбобларининг ашаддий ишқибози. У ҳатто ўзининг хусусий рок гуруҳини ҳам тузган.
5. Мануэль Альмуния. Хоббиси — эртаклар ёзиш. “Арсенал” жамоасининг собиқ посбони ўзи ёзган эртакларнинг кенг оммага тарқалиб кетишини истамайди. Буни у “Эртакларни танилиш учун эмас, шунчаки қизиқиш туфайли ёзаман”, деб изоҳлайди.
6. Андрей Аршавин. Хоббиси — либослар яратиш. Андрей футболдан бўш вақтларида ўзгача либослар яратиш, аниқроғи, модельерлик билан шуғулланади. Футболчи Санкт-Петербургда дорилфунун либослар яратиш технологиялари ва дизайни соҳаси бўйича таҳсил олган ва бу борада яхшигина мутахассис ҳисобланади. У 15 ёшгача бўлган болалар учун яратган либослар тақдимотини муваффақиятли тарзда ўтказган.
7. Томаш Росицки. Хоббиси — гитара чалиш. Томашнинг ноодатий қизиқишлари у қадар кўп эмас. Бу хоббилар орасида энг муҳими эса футболчининг гитара чалишга муккасидан кетганидир. Таъкидлаш керак, бу борада яхшигина иқтидорга эга бўлган “Арсенал” футболчиси яқинлари ёки оила аъзоларининг қувончли кунларида ажойиб созандага айлана олади. Яъни ҳеч бир кеча Томашсиз ўтмайди.
8. Майкл Оуэн. Хоббиси — отларни кўпайтириш. Бу футболчининг севимли машғулоти жуда ҳам кўп. Майкл, айниқса, от боқишга жуда қизиқади. У 64 гектар ҳудудни ўз ичига оладиган ферма ташкил этган ва бу ерда энг зотдор отларни парвариш қилади. Умуман олганда, Англияда от ишқибозлари кўп. Хусусан, Уэйн Руни ва ҳатто “Манчестер Юнайтед”нинг собиқ бош мураббийи сер Алекс Фергюсон ҳам от минишни ёқтиришади.
9. Златан Иброҳимович. Хоббиси — ов ва балиқ ови. Швед “чингачкуки” Швеция пойтахти Стокгольмнинг ғарбида жойлашган бутун бошли оролни сотиб олди. “Давенсо” ороли Швецияда катталиги бўйича учинчи ўринни эгаллайди. Аммо Златан бу билан кифояланиб қолмоқчи эмас. У бўш вақтини чоғ ўтказиш учун бошқа ҳудудларни ҳам сотиб олмоқчи. 500 гектар ҳудудда Иброҳимович, асосан, ов қилишни хуш кўради. “Давенсо”да ёввойи буғу ва тўнғизлар жуда кўп. “ПСЖ” ҳужумчиси истаса балиқ овлаши ҳам мумкин ва у бу имкониятни ҳеч қачон қўлдан чиқармаган. У ўзининг “Мен — Златан Иброҳимович” номли автобиографиясида у жамоадошларини ҳам ўз севимли машғулотига жалб қилмоқчи эканлигини таъкидлаган.
10. Лионель Месси. Хоббиси — “Playstation” ўйнаш.
“Барселона” ҳужумчиси ўйиндан бўш вақтини ҳам футбол билан ўтказишни ният қилган, шекилли, бўш вақти топилган заҳоти “Playstation” билан овора бўлади. Лео кўпинча “Барселона”ни танлайди.
11. Дэвид Бекхэм. Хоббиси — қиличбозлик. Бекхэм ўзининг ғайриоддий хоббилари билан кўпчиликни ҳайрон қолдириб келган. Жумладан, у айни пайтда футбол соҳасидан бироз четлашганда қиличбозлик билан шуғулланиб туради. Ҳатто у Голливуд актёрлари Уилл Смит ва Том Круз билан бирга фильмда суратга тушишни ният қилган. “Уч мушкетёр” номи билан чиқиши режалаштирилган ушбу картина дунё киноихлосмандларининг эътирофига сазовор бўлиши тайин.
12. Робин Ван Перси. Хоббиси — стол тенниси ўйнаш. Голландиялик чарм тўп устаси “Арсенал”да туп сурган пайтлариданоқ стол теннисига меҳр қўйганди. У кейинчалик маҳоратини ошириб борди. Ҳатто Перси стол теннисининг профессионал вакиллари билан ўйнашга қарор қилди. Ёш профессионал спортчи Дариус Найт таклиф қилинди ва стол тенниси бўйича мусобақа ўтказилди. Тўғри, бу учрашувда Робин ван Перси ютқазди, аммо у мухлислар ва Дариус Найтда ижобий таассурот қолдирди. Найт Персини футболни тарк этиб, стол теннисига ўтишга кўндиришга уриниб кўрди. Лекин Перси футболсиз яшай олмаслигини айтиб, бу таклифни рад этди. Аммо у стол тенниси билан шуғулланишни канда қилгани йўқ.
Интернет материаллари асосида Низомжон ИСЛОМОВ тайёрлади.
