Баҳор келишига 3 кун қолганда қитьамизда Осиё чемпионлар лигасининг гуруҳ босқич ўйинлари старт олмоқда. Бу мавсум яна "Ғарб" минтақасига қайтган "Бунёдкор" мамлакатимизнинг ягона вакили сифатида мусобақада қатнашади. Миржалол Қосимов жамоаси бугун Тошкент вақти билан соат 22:00да Саудия Арабистонининг "Ал-Фатҳ" клубига қарши учрашув ўтказади.

Кеча учрашув олдидан матбуот анжумани ташкил этилганидан ва унда билдирилган фикрлардан хабарингиз бор. Шундан сўнг араб матбуотида мезбонлар яримҳимоячиси Муҳаммад Хайдарнинг интервьюси ҳам пайдо бўлди. Қуйида унинг фикрлари билан танишишингиз мумкин.

"Осиёнинг бундай йирик форумида ўйнаш маҳаллий чемпионатда қатнашишдан фарқ қилади, албатта. Ўзимизни танитиш имконияти бизга катта рағбат беради. Бунинг учун эса, аввало, йўлнинг бошида ғалаба қозона олишимиз керак. Кўпчилик бизда ушбу турнирдаги пойдевор йўқ деб ҳисоблайди, аммо бу "Бунёдкор"га қарши ўйиннинг илк дақиқаларида бўлиши мумкин холос. Гуруҳдаги барча рақибларга биз етарлича қаршилик кўрсата оламиз.

Ўзбек жамоасини мағлуб этиш қийин эканини яхши тушунаман, аммо бош мураббий Фатхи ўйин сценарийлари ичидан энг тўғри тактикани танлай олади ва бу қийинчиликни енгиб ўтади. Мураккабликнинг сабаби - рақибимиз Ўзбекистоннинг энг кучли жамоаларидан бири. Улар бу турнирда аввал етти бор қатнашишган. Шундай экан, биз ғалабага ва гуруҳдаги рақибларимиздан бирини ортда қолдиришимизга умид қиламиз.

Ўйиннинг муҳим эканини бўрттириб юбориш ёмон оқибатларга олиб келиши ҳам, яъни гол уришимизга тўсқинлик қилиши мумкин. Аммо шунга қарамай, тезкор гол уришимизни сабрсизлик билан кутаман. Биз юқори концентрация ва хотиржамлик билан ўйнаймиз, сабаби ҳали ўзимиз хоҳлаган даражага эриша олмадик.

Ўз мухлисларимиз қаршисида тўп сурамиз, аммо бу бизда босимни оширмайди, балки катализатор вазифасини ўтайди. Мухлисларнинг қўллаб-қувватлаши доим керак, бу рақибда ҳам босимни юзага келтиради", - дейди Муҳаммад Хайдар.