“Ал-Жаиш” футболчилари аэропорт худудини тарк этишиб, автобусга жойлашишди ва маълум вақт ўз юкларини кутиб ўтиришди. Фурсатдан фойдаланиб, қатарликларнинг бразилиялик легионери Нилмар билан қисқача суҳбатлашдик.
- “Бунёдкор” жамоаси ҳақида нималар биласиз?
- Жамоанинг Осиё Чемпионлар лигасидаги “Ал-Фатҳ”га қарши ўтказган учрашувини томоша қилдим. “Бунёдкор” жисмонан кучли тайёргарликка эга. Шунингдек, футболчилар бир-бирларини яхши тушунишади ва керак пайтда жойларини алмаштириб ҳаракат қилишади. Ўйлайманки, “Бунёдкор” билан баҳсдан олдин мураббийимиз рақибнинг ожиз томонлари ҳақида бизга маълумот беради.
- Уч-тўрт йил илгари “Бунёдкор” сафида бир неча бразилиялик машҳур юлдузлар фаолият олиб боргани ҳақида хабардормисиз?
- Албатта, Ривалдонинг “Бунёдкор” сафига ўтгани ҳақида эшитиб, жамоа ҳақида маълумот йиғганман.
- Тошкент сафари олдидан Ривалдо, Сколари ёки юртимизда ўйнаб кетган бошқа бразилияликлар билан “Бунёдкор” ҳақида гаплашдингизми?
- Терма жамоага чақирилган пайтларимда, баъзи-баъзида “Бунёдкор” ҳақида суҳбатлашиб турардик. Шунингдек, Сколари ва Ривалдонинг интервьюлардаги “Бунёдкор” ҳақида айтган гапларини ҳам ўқиганман. Аммо Тошкентга келишдан олдин улар билан алоҳида гаплашганим йўқ.
- “Бунёдкор”да тўп тепган Эдсон Рамос ва Жоао Виктор кейинги фаолиятини Испаниянинг “Мальорка” клубида давом эттиришди. Сиз уларга қарши Ла-Лигада ўйнаган бўлишингиз керак.
- Ҳа, бу икки футболчини эслайман.
- Нима деб ўйлайсиз, “В” гуруҳидан кейинги босқичга қайси икки жамоа йўлланма олади?
- Ҳозирдан бир нарса дейиш қийин. Чунки гуруҳимизда кучли жамоалар бор. 1/8 финалга йўлланма оладиган бахтли икки клубнинг бири “Ал-Жаиш” бўлишини истардим.
Баҳодир МИРЗАЕВ суҳбатлашди.
