Япониянинг Саитама шаҳрида 26 март, чоршанба куни фигурали учиш бўйича жаҳон чемпионати баҳслари старт олди. Унда ўзбекистонлик Миша Ге ҳам иштирок этди.
Қисқа дастурда 20-рақам остида чиққан ўзбекистонлик спортчи 60,34 балл тўплаб, умумий жадвалда 27-ўринни эгаллади ва мусобақа финал босқичига ўта олмади.
«Узр, оғайнилар, бугунги чиқишим ёмон бўлди», – деб ёзди Миша Ге мусобақалардан сўнг ўз твиттерида. У ўзини қўллаб турган барчага миннатдорчилик билдириб, мусобақа ўзи учун якунланганидан афсусда эканлигини маълум қилган.
Мусобақада япониялик Матида Тацуки ғолибликни қўлга киритган. Унинг муз устидаги чиқиши 98,21 баллга баҳоланган. Кучли бешликдан, шунингдек, Хавьер Фернандес (Испания), Юдзуру Ҳаню (Япония), Томаш Вернер (Чехия) ва Хань Янь (Хитой) ўрин олган.
Фигурали учиш бўйича 2013 йилги жаҳон чемпионатида Миша Ге нисбатан муваффақиятли иштирок этганди. Мусобақада 16-ўринни эгаллаган ўзбекистонлик спортчи, айнан шу натижаси сабаб Сочи-2014 Қишки Олимпиадасида иштирок этиш ҳуқуқини қўлга киритган эди.
Олимпиада баҳсларида Миша Ге саралаш босқичидан муваффақиятли ўтиб, ҳал қилувчи босқичда 17-ўринни эгаллади. Миша Ге ўзининг антиқа чиқишлари билан Олимпиада томошабинлари ёдида қолди. Хусусан, Американинг энг йирик онлайн-нашрларидан бири шундай деб ёзганди: «Ўзбекистоннинг икки карра чемпиони мусобақада 17-ўринни эгаллаган бўлса-да, одамларнинг кайфиятини кўтаришда у олтин медалга сазовор, деб ўйлаймиз».
