“Андижон” ва “Бухоро” жамоалари ўртасидаги учрашувдан сўнг одатдагидек матбуот анжумани бўлиб ўтди ва унда мезбонлар устози Азамат Абдураимов қуйидаги фикларни билдирди.

— Аввало жамоамиз ишқибозлари дастлабки ғалаба билан табриклайман. Бугун шогирдларим ғалабага бўлган ишончни ва характерни кўрсата олишди. Ўйиндан бир кун олдин йиғилиш ўтказиб, фақат ғалаба учун майдонга тушиб натижа кўрсатиш кераклиги айтилганди. Бугун йигитлар юклатилган вазифани муносиб уддалашди. Шу боис ўйиндан қониқиш ҳосил қилдим. “Бухоро” ҳам яхши жамоа эди ва улардан очко олиш осон бўлмади. “Бухоро” аввалги турда “Бунёдкор” билан куч синашиб, очко олишни уддалаганди. Шу боис рақиб оддий эмасди. Қолаверса, жамоани тажрибали мутахассис бошқармоқда. Таркибида яхши савиядаги ўйинчилар борлиги кўриниб турибди. Улар амалдаги чемпион билан бежизга дуранг ўйнашмаганди. Шу сабабли биз ҳужумкор ўйин намойиш этиб рақибни хатога йўл қўйишга мажбур қилишимиз керак эди. Якунда шундай ҳам бўлди ва керакли натижага эришдик.

— Ўйинни ҳужумкор тактикада бошлаб уч нафар ҳужумчини бошланғич таркибга киритгандингиз. Лекин сўнгги сонияларда Азизовни Абдураҳимовга алмаштирдингиз. Бу нима билан боғлиқ?
— Ҳа, Ражабов, Солиев ва Азизов билан ўйинни бошлашни режалаштиргандик. Афсуски, ўйин олди машғулоти пайтида Алишернинг оёғидаги эски жароҳат безовта қилди. Шу боис у майдонга туша олмайдиган бўлди. Натижада унинг ўрнига Абдураҳимовни таркибга киритдик. Баҳромда ҳам кичик жароҳат бор эди ва тўлиқ ўйнашга тайёр эмасди. Шунга қарамай, Абдураҳимов бугун яхши ўйин намойиш этди. Азизов асосий таркиб ўйинчимиз ва уни тезроқ сафга қайтишини хоҳлаймиз. Бугун ғалаба қозонганимиз билан ҳали қиладиган ишларимиз кўп ва буларни бартараф этишимиз лозим.