Матбуот анжуманининг иккинчи қисмида “Навбаҳор” бош мураббийи Бахтиёр Ашурматов журналистларнинг қизиқтирган саволларига жавоб қайтарди:

— Наманганда барча талабларга жавоб берадиган замонавий ўйингоҳ фойдаланишга топширилди. Бунинг учун давлатимиз раҳбарларига катта раҳмат. Қайта таъмирланган ўйингоҳни мухлислар, футболчилар катта совға сифатида қабул қилдик. Бугун ўйингоҳни очилиши ва биринчи ўйин ўтказилганлиги учун Наманганда катта байрам эди. Байрамларини бузишга бизни ҳаққимиз йўқ эди. Шу сабабдан майдонга фақат ғалабани кўзлаган ҳолда тушгандик. Бундан ташқари, сўнгги турлардаги мағлубиятлар мусобақа жадвалидаги мавқеимизга таъсир кўрсатганди. Ғалабани қўлга киритиш орқали мухлисларни хушнуд қилишни ўйлагандик. Янги ўйингоҳ, мухлисларни кўплиги боис йигитлар ҳаяжонланишди. Биринчи бўлимнинг дастлабки қисмида ўйинимиз қовушмади. Ишқибозларни ҳам тўғри тушуниш керак. Сабаби улар ғалаба ва чиройли ўйинни исташади. Шунинг учун ҳужумга ўтишимизни талаб этишди. Лекин, “Олмалиқ” ҳам яхши шаклланган таркибга эга жамоалар сирасига киради. Қолаверса, тажрибали мутахассислардан бири Игорь Шквирин ҳар қандай ҳолатда жамоасини ғалаба сари етаклай олади. Биринчи голга қадар футболчиларимиз ўзларига кела олишмади. Жуда қийин бўлди. Жавоб тўпи киритилгач, эса йигитларда ўзларига бўлган ишонч ортди ва мухлисларимизни ажойиб тарзда қўллаб-қувватлашлари натижасида олдинга интилдик. Худога шукрки, ишқибозларимиз олдида юзимиз ёруғ бўлиб, якунда ғалабани қўлга киритдик. Ушбу ғалаба билан клуб раҳбарияти ва мухлисларимизни табриклайман.