Норвегиянинг Тромсё шаҳрида ўтаётган Бутунжаҳон шахмат олимпиадасида Ўзбекистон эркаклар терма жамоаси учинчи турда бразилиялик шахмат усталари билан баҳс юритиб, 3,5:0,5 ҳисобида зафар қучишди. Ушбу баҳсда Антон Филиппов, Марат Жумаев ва Жаҳонгир Воҳидовлар рақибларини мағлуб этишган бўлса, Рустам Қосимжонов дурангга имзо чекди.

Эътиборлиси, эркаклар терма жамоамиз шу кунга қадар ўтказилган уч турнинг барчасида ғалаба қозониб, юз фоизлик натижа билан зафарли одимлашда давом этишмоқда. Эслатиб ўтамиз, биринчи турда, Кипр интелектуалларидан 3,5:0,5 ҳисобида устун келган ҳамюртларимиз, иккинчи турда Дания терма жамоасини 2,5:1,5 ҳисобида мағлуб этишди. Бугун терма жамоамиз Германия термасига қарши дона суради. Терма жамоамиз жадвалда 4-ўринга кўтарилиб олди.

Ўзбекистон аёллар терма жамоаси эса учинчи турда Сербия термасига 1:3 ҳисобида имкониятни бой берди. Сарвиноз Қурбонбоева ва Моҳинур Қаҳрамоновалар дуранг натижани қайд этишган бўлса, Севара Боймуродова ва Ольга Собирова мағлубиятга учрадилар. Бугун аёллар терма жамоамиз Шотландия термаси билан куч синашадилар.