Норвегиянинг Тромсё шаҳрида бўлиб ўтаётган Бутунжаҳон шахмат олимпиадасида кеча 8-тур ўйинлари бўлиб ўтди. Ўзбекистон эркаклар терма жамоаси Австралияга қарши баҳсда иштирок этган бўлса, аёллар терма жамоаси Испанияга қарши дона суришди.

Эркаклар
Кетма-кет иккита мағлубиятдан кейин ниҳоят Ўзбекистон эркаклар терма жамоаси ғалаба нашидасини суришди. Рустам Қосимжонов ва Улуғбек Тиллаев ўз партияларини ғалаба билан якунлашди. Антон Филиппов ва Марат Жумаев рақиб билан дурангга имзо чекишди. Натижада 3-1, терма жамоамиз фойдасига.

Ушбу ғалабадан кейин жамоамиз 23-ўринга кўтарилди. Бугун шахматчиларимиз Финляндия билан баҳс юритишади. Мусобақада 56-рақам остида тартибланган финлар ҳозирча 39-ўринни эгаллаб  туришибди.

Эркаклар мусобақасида кеча пешқадам Озарбойжонни мағлуб этган Хитой 1-ўринга кўтарилиб олди (14 очко). Озарлар эса 4-поғонага тушиб кетишди. Франция ва Украина (ягона мағлубиятини Ўзбекистондан қабул қилган) 2 ва 3-ўринларда боришмоқда (13 очкодан).

Аёллар
Ўзбекистон аёллар терма жамоаси эса иккита ғалабадан кейин мағлубият аламини тортди. Сарвиноз Қурбонбоева ва Ольга Сабирова испаниялик шахматчиларга ютқазиб қўйишган бўлса, Ирина Геворгян ва Севара Боймуродова дуранг ўйнашди — 1-3.

8-турдан кейин терма жамоамиз 29-ўринга тушиб кетди (10 очко). Бугун қизларимиз Кубага қарши дона суришади. Кубаликлар 19-рақам остида тартибланишган ва ҳозирда 27-ўринни банд этиб туришибди.

Аёллар мусобақасида Россия терма жамоаси ғолибликни қўлга киритишга жуда яқин туришибди. Улар барча ўйинларда рақибаларини мағлуб этишди ва 16 очко билан яққол пешқадам бўлиб туришибди. Хитой 14, Франция, Арманистон ва Украина 13 очкога эга бўлиб туришибди.