Бугун Хитойнинг Ченду шахрида бўлиб ўтадиган клублар ўртасидаги Осиё чемпионати олдидан жамоалар мураббийлари ўртасида матбуот анжумани бўлиб утди. Унда "Локомотив" жамоасининг бош мураббийи Ахаджон Юсупов қуйидаги саволларга жавоб бериб ўтди:

— Турнирнинг ташкилий қисми ҳақида фикрингиз ва ўзингизнинг жамоангиз ҳақида гапириб берсангиз?
— Авваламбор турнирнинг ташкилотчиларига миннатдорчилик билдирамиз. Бизни ўз уйимиздагидек қарши олишди ва ҳамма нарса аъло даражада. Ушбу чемпионат Осиё миқёсида муҳим аҳамият касб этади. Барча жамоаларнинг чемпионлик номи остида келиб ушбу турнирда қатнашиши, чемпионатнинг янада жозибадор ўтишини таъминлайди. Жамоамизга келсак, бизда иқтидорли ўйинчилар етарли ва биз бу турнирга май ойидан бери тайёргарлик кўриб келяпмиз.

— Ўқув йиғин машғулотларини қаерда ўтказдингиз ва сизда назорат учрашувлари бўлдими ва қандай натижалар қайд этдингиз?
— Биз йиғинни пойтахтимиз Тошкент шаҳрида ўтказдик ва 4 та назорат учрашувида қатнашдик ва барчасида ғалаба козондик.

— Турнирда ўз жамоангизнинг кучига ишонасизми, чунки сизлар билан бир гуруҳда мезбонларнинг "Шенжен Нанлинг" жамоаси хам иштирок этяпти. Гуруҳда ким ғолиб чиқишини айта оласизми?
— Гуруҳ жиддий жамоалардан ташкил топган. Айтиб ўтганингиздек, мезбон жамоада ҳар доим бироз устунлик бор ва жамоа мухлислари томонидан жиддий тарзда қўллаб-қувватланиши имконияти юқори. Бу албатта уларга руҳий куч бағишлайди, аммо биз ҳам бу ерга юқори натижаларни кўзлаб келганмиз ва умид қиламанки, гуруҳдаги барча учрашувлар жуда қизиқарли ўтади. Сабаби?! Оддий, чунки бу ердаги ҳамма жамоалар ўз мамлакатининг чемпионлари ҳисобланишади.