“Нефтчи” – “Насаф” (0:1) учрашуви поёнига етгач, ўтказилган матбуот ажуманида дастлаб меҳмонлар устози Рўзиқул Бердиев журналистлар саволларига жавоб бериб ўтди.
- Ўйлайманки, натижа учрашувга мос бўлди. Биз бугун ғалабага ҳақли равишда эришдик – дея гап бошлади Рўзиқул Саъдуллаевич. – Чунки кўрган бўлсанглар, устунлик биз томонда бўлди. Йигитларни олдига бугунги ўйинда тўпни кўпроқ ўзимизда назорат қилиш вазифаси қўйилганди. Футболчилар буни уддасидан чиқди. Шуни эвазига ташаббусга эришди ва ғалабани қўлга киритдик.
Футбол 20 дақиқа эмас балки 90 дақиқадан иборат. Агарда рақиб жамоа устунликка эришганида, бутун ўйин давомида шу тартибда ўйнаши керак эди. “Нефтчи”ни агрессив ўйнашини олдиндан билгандик. Шунга мос равишда тайёргарлик кўргандик. Дастлабки 20 дақиқадан сўнг гувоҳи бўлдинглар ўйин тўлиқ бизнинг назоратимиз остида ўтди.
“Нефтчи” ҳам бугун кучли ўйнашга ҳаракат қилди. Лекин дарвозамизга йўл топа билишмади.
Мен жамоалар таркибидан ҳеч бир футболчини алоҳида ажратиб кўрсатишни истамайман. Одатим шунақа. Сабаби футбол жамоавий ўйин. Бугун айнан жамоавий ўйин эвазига уч очкони қўлга киритдик – дейди Бердиев.