Пойтахтимизда эркин, юнон-рум ва аёллар кураши бўйича катталар ўртасида ўтказилаётган жаҳон чемпионатида аёллар кураши бўйича дастлабки 4 вазн тоифасида ғолиб ва совриндорлар номи маълум бўлди.

Қизғин кечган беллашувлар якунларига кўра ўз вазн тоифаларида Эри Тосака (Япония, 48 кг), Чихо Хамада (Япония, 55 кг), Церенчимед Сухе (Мўғилистон, 60 кг) ва Алина Фокен (Германия, 69 кг) олтин медалга сазовор бўлдилар.

Мазкур мусобақада Ватанимиз шарафини ҳимоя қилган Даулетбике Якшимуратова (-48 кг), Севара Эшмуратова (-55 кг), Саломат Кучимова (-60 кг) ва Азиза Султонмуродова (-69 кг) афсуски совринли ўринларни қўлга кирита олмадилар.

Бугун аёллар ўртасида -53 кг., -58 кг. ва -75 кг. вазн тоифаларида саралаш ҳамда финал баҳслари ўтказилади.

Вазни 53 кг.гача бўлган спортчилар мусобақасида иштирок этадиган ҳамюртимиз Зуҳра Мустанова саралаш босқичидаги биринчи беллашувни КХДР вакиласи Мёнг Жонгга қарши ўтказади. -58 кг. вазн тоифасида ғолиблик учун кураш олиб борадиган юртдошимиз Асем Сейдаметова 1/8 финалда япониялик Каори Ичо билан баҳс юритади. Ва ниҳоят, вазни 75 кг.гача бўлган спортчилар орасида Ватанимиз шарафини ҳимоя қиладиган Гулмира Исматова ҳам нимчорак финалдан баҳсларга киришади. Гулмира ушбу босқичда бразилиялик Алине Да билан куч синашади.