Бу икки жамоа миллий чемпионат доирасида ўзаро 27 маротаба куч синашган.

Шулардан 20 тасида қаршилик футболчиларнинг қўли устун келган бўлса, бир маротаба дуранг қайд этилган. Яна олти учрашувда жиззахликларга омад кулиб боққан. Тўплар нисбати 57:26. Устунлик “Насаф” жамоаси фойдасига.

Ўзаро ўйинларда “Насаф”чилар тўрт марта йирик ҳисобда ғалаба қозонган (3:0 -2000, 2009  йил, 4:1 -  2004, 2009).

“Сўғдиёна” футболчилари сўнгги марта 2008 йил 29 августда “Насаф” устидан ғалаба қозонишган. Шундан кейин кетма-кет 7 ўйиндан бери қаршилик футболчилари уч очкони ўз ҳисобларига ёзиб қўйишган.

Ўзаро ўйинларда Зафар Холмуродов жиззахликлар дарвозасини 8 марта аниқ нишонга олган. Шунингдек, Бахтиёр Давлатов, айни пайтда “Насаф” асосий таркибига бош мураббийлик қилаётган Рўзиқул Бердиев ва Баҳодир Аннаматов ўзаро ўйинларда 3 марта “Сўғдиёна” дарвозасини ишғол этишган. 2000 йили Қаршида ўтган бахсда “Насаф” илк марта “Сўғдиёна”ни йирк (3:0) ҳисобида мағлуб этган. Ўша беллашувда қаршликлар дарвозасини қўриқлаган Петр Гизимчук 11-метрлик жарима зарбасини голга айлантира олган.

Айни пайтда ўтказилган 19 турдан сўнг “Насаф” футболчилари турнир жадвалининг 3-поғонасида мустаҳкам жой олган бўлишса, “Сўғдиёна” футболчилари 14 очко билан жадвалнинг 13-поғонасида боришмоқда ва элитада қолиш учун кураш олиб боришмоқда.