"Ювентус" клуби бош мураббийи Массимилиано клубнинг аввалги бош мураббийи Антонио Конте билан ўзини солиштирмасликни сўради ва ҳар бир мураббий ўз фалсафасига эга эканлигини таъкидлади.
Кеча тунда "Ювентус", Италия "А" серияси навбатдаги турида ўз уйида "Чезена" устидан йирик 3:0 ҳисобида ғалаба қозонди. Мазкур учрашувдан сўнг туринликлар бош мураббийи Массимилиано Аллегри ҳали жамоа ўз ўйинин янада шакллантириши кераклигини айтиб ўтди.
"Ҳар бир мураббий жамоа фойдаси учун қандай ишлашни лозим топса, айнан шундай ишлаши керак. Ҳар бир мураббийда ўз қараши ва ўз консепцияси бўлади. Конте бошчилигида "Ювентус" ажойиб уч мавсумни ўтказди. Мен айни дамда ушбу жамоани бошқариб турганимдан хурсандман. Ўйинда 90 дақиқа бўлса, унинг ҳар бир дақиқаси ҳақида қайғураман", - дейди туринликлар бош мураббийи.
"Айрим пайтларда ўйин темпини кучайтириш, бошқа пайти эса, аксинча ҳаракат қилиш лозим. Ўйинларда ғалаба қозониш учун ҳужумларни яхши ташкил қилиш билан бирга, яхши футболчиларга эга бўлиш керак. Акс ҳолда, бу ҳудди футболни компютер орқали ўйнашга ўхшаб қолади. Мен ажойиб жамоага келдим. Бу жамоа ўйинини эса, янада кучайтириш лозим", - дейди Аллегри.