МЛС мунтазам чемпионати доирасида бўлиб ўтган «Цинциннати» ва «Интер Майами» (3:5) учрашуви якунланганидан сўнг, ташкилотчилар баҳсдаги сўнгги гол муаллифи борасидаги қарорини ўзгартирди.
Учрашувнинг 89-дақиқасида «шаҳарликлар» томонидан киритилган гол аввалига расмий сайтда Лионель Месси номига ёзилган эди. Бироқ бир неча дақиқа ўтгач, лига раҳбарияти ушбу вазиятни қайта кўриб чиқиб, голни «Цинциннати» дарвозабони Роман Челентанонинг автоголи сифатида қайд этди.
Шу тариқа, 38 ёшли Мессининг ушбу ўйиндаги кўрсаткичи хет-трикдан дублга айланди. Шунингдек, унинг ҳисобида битта голли узатма ҳам бор. Маълумот учун, Лионель Месси фаолияти давомида урган расмий голлар сони эндиликда 909 тани ташкил этмоқда.
